أنا سفاح المعـــادى

.الموضوع الأول : أمن الدولة يا أمن الدولة
.الموضوع الثاني : أنا سفاح المعـــادى
.الموضوع الثالث : خلاويص؟ لسة ..بقلم هشام هلال
.الموضوع الرابع : حريق محدود..كله تمام

أمـن الدولـة يا أمـن الدولـة

أمن الدولة....جملة صغيرة لكن معناها كبير جدً و خطير جداً
فأمن الدولة هو الحفاظ على كيان الدولة من أى مساس به
لكننا نحن العامة من الشعب..نعرف أمن الدولة بأنه الجهاز
الأمنى الذى يعمل على حفظ أمن الدولة..وما ادراك ما أمن الدولة
من الممكن أن تكون سمعت عن مصادرة شرائط تابعة لقناة الجزيرة
وحبس القائمة على اعداد البرنامج الذى كان سوف يناقش موضوع
التعذيب فى سجون الوطن العربى
تم مصادرة الشرائط التى كانت تحتوى على مشاهد تمثيلية لأحداث
يرويها أشخاص تم تعذيبهم فى اقسام الشرطة المصرية
وتم تلفيق تهمة للمعدة بأنها تصور افلام تمثيلية
لتقول ان هذا ما يحدث فى مصر
( على اساس ان العالم اهبل بيصدق كل حاجة )
والتهمة الرسمية هى تصوير شرائط تهدد الأمن العام لمصر
..وأدرجت القضية على انها قضية أمن دولة
لا مش كدة و بس دا كمان عرضوا أجزاء من الشرائط السابق ذكرها
في برنامج الحكومة..(( البيت بيتك )) علشان الناس تشوف بشاعة الموقف
لا و كمان للتدليس تم عرض الفيديوهات الحقيقية اللى اتصورت لظباط
وعساكر اثناء تعذيبهم للمواطنين يمكن انت تفهم من نفسك
انها هي كمان مش حقيقة
المهم الدنيا اتقلبت و القضية دلوقتى منظورة أمام القضاء المصرى
..ولكن معدة البرنامج خرجت بكفالة على ذمة القضية
نيجى بقى لما حدث على شاشة قناة روتانا سينما
أكيد كتير منكم تابع حلقات برنامج (( هالة شو )) اللى كان موضوعه
فتيات الليل
واكيد شفتم ازاى تم الأساءة للشعب المصرى و بناته
واحد يقولى هتخليها أساءة و كلام مجعلص ليه؟
أقوله لما برنامج يكلم عن الدعارة و الشذوذ الجنسى
ويجيب نماذج من مصر بس
دا مفهوش تعمد أساءة لمصر
طب ما ظهرش ليه نماذج فتيات من السعودية
اللى هى بلد صاحب قناة روتانا
طب ولبنان اللى كان فيها 11 الف سعودى قبل الحرب
الله العالم كانوا رايحين ليه؟
هى السعودية مفهاش دعارة و شذوذ جنسى؟
ولا هى مصر بس
المشكلة ان المسج اللى وصلت لأى فرد شاف الحلقات
ان اللى عايز بنات دعارة ينزل مصر
اللى عايز يمارس شذوذ برحته ينزل مصر
دا غير الدعوة الصريحة للبنات اللي اتفرجت على الحلقات
للممارسة الدعارة..لما يطلع نموذج من البنات و يقول
انا بحصل فى الشهر 10 ألاف جنيه
دا مش فيه تشجيع؟
دا كدة بيوصلوا لأى بنت
عايزة فلوس..طريقك الدعارة
عايزة سيارة.. طريقك الدعارة
عايزة دهب و فساتين.. طريقك الدعارة
يعنى بيعى نفسك
يعنى بيعى شرفك
يعنى بيعى دينك
.علشان تعيشى حياه كريمة
مش هى دى الرسالة اللى وصلت
حد يقولى انه فهم من الكلام غير كدة
والله اعلم البرنامج قاصد يوصل المسج دي
ولا لا..لكن دى اللى وصلت
نيجى بقى للى يغيظ بجد
جهاز أمن الدولة اللى اتحمق على برنامج قناة الجزيرة
لم يعلق على ما حدث فى برنامج قناة روتانا سينما
حاجة غريبة
مع انها سمعة مصر بردوا اللى اتمرمط بكرمتها الارض
لكن كلنا فهمنا السكة ماشية ازاى
هقولك انا..امن الدولة
مش بيحمينا احنا
لا بيحمى السلطة..يعني رئيس
و وزراء و الجهات الحكومية
زى الشرطة مثلاً
لكن لما شعب مصر كله يتهان فى قتاة معينة مش مشكلة
اهم حاجة مجتش سيرة مبارك
والكلاب اللى حوليه
طب واحد يقولى ما هما شتموا الشرطة بردوا
لما بنت قالت ان الحكومة..قصدها الشرطة
بتحمينا و بتدينا ترخيص
و قالت واحدة من ضيوف البرنامج
ان الشرطة تحمى الدعارة من اجل مرة فرى
يعنى مرة ببلاش
طب ما الشرطة اتهانت اهوه..طب ليه امن الدولة متكلمش؟
لغاية دلوقتى مش عارف أمن الدولة سكت ليه
يمكن خايف على العلاقات المصرية السعودية؟
ولا هو خيار و فقوس
ما خلاص يا مصرين بعد ما اتغير شعار الشرطة فى خدمة الشعب
فهمنا كل حاجة
الشعار كان زمان الشرطة فى خدمة الشعب و بمرور السنين
أصبح الشرطة فى خدمة القانون
وبعد مرور شوية سنين
بقى الشرطة و الشعب فى خدمة القانون
وبعديها بفترة وجيزة
اصبح الشعار الشرطة و الشعب فى خدمة الوطن
عارفين هو مين الوطن؟؟
الوطن يساوى مبارك
وكلابه اللى حوليه خلاص مبارك هو الوطن
اوعى تشتم مبارك يا راجل دا هو الوطن
وأصبح سب مبارك خيانة عظمة للوطن
سلملى على الوطن و المواطنة
....مفيش فايدة....

أنا سفــــــاح المعـــــــــادى

يوم من الأيام ..لقيت نفسى مخنوق و مكتأب.. دا بسبب أنقطاع النت

و أنى قاعد فى البيت مش لاقى حاجة أعملها ... فكرت شوية

و قولت اروح لعصومة حبيب قلبى فى المعادى
المهم ظبت نفسى و حضرت الهدوم و كلت و قومت لبست

و انا نازل أفتكرت انى مكلمتش عاصم
ولا قولتله أنى جاى..أيه قلة الزوق دى.. المهم كلمته

من الموبيل قلتله انت فاضى يا عاصم اجيلك
قالى طب اقفل و هكلمك على البيت.. كلمنى على البيت

قلتله فاضى أجيلك نقعد مع بعض شوية..؟
..قالى انا رايح لأسلام..أوووبس..رخمت بقى انا عايز اخرج و خلاص

قلتله يعنى ينفع اجى معاك لأسلام قالى ايوة طبعا..و شوية و قالى ما تخليك

يا ابو حميد النهاردة و تعالى بكرة نقعد مع بعض

من اول اليوم..رخمت انا بقى..قلتله ما انا مش بكون فاضى غير الجمعة

..علشان الكلية..و لم يجد عاصم مفر..ههههههههههه

قالى خلاص يا ابو حميد تعالى انا مستنيك..هيه هيه هيه
مصدقت روحت نازل من البيت و اول ما وصلت محطة مترو المعادى كلمته

..قالى اركب ميكروباص و انزل عند مؤمن وانا هاجى اخدك

..ركبت الميكروباص و نزلت عند مؤمن و كلمت عاصم

و لقيته واقف بالعربية مستنينى روحت و ركبت
روحنا لأسلام قعدنا معاه كام ساعة كدة..و بعدين روحنا البيت عند عاصم
قعدت بردوا شوية عند عصومة و بعدين على الساعة واحدة او اتنين

..كدة نزل عاصم معايا يوصلنى بالعربية لماكن اركب منه

المهم نزلت عند ميكروباص رايح رمسيس
السبنس كله حصل فى الميكروباص بتاع رمسيس ده..ههههههههههه
ركبت و ركب جنبى شخص كدة شكله سفاح رسمى..
عارفين انتم شكل السفاحين بتوع التلفزيون...ههههههههههههه
:المهم الشخص اللى قعد جنبى ده ..مواصفاته كا التالى
حواجبه كثيفة- شاب كثيف – و شعر الرأس كثيف بردوا هههههههههه
شكله مكنش مطمأن خاااااااالص..قولت لنفسى عيب عليك يعنى
دا الشرطة فى كل حتة.. يعنى كل مترين فى أتنين عساكر و ليهم مكان شيك كدة
قاعدين فيه..المهم اقنعت نفسى ان الامن فى التمام
و فجأة كدة و انا دماغى عمالة تودى و تجيب و عمال أكتب سيناريوهات فى دماغى
للى ممكن يحصل..لقيت البنى آدم اللى جنبى شد مع السواق و اتتخانقوا مع بعض
بالكلام يعنى..انا قولت بس..احنا اول ما هنروح حتة فاضية كدة او نخرج من المعادى
:و اللى جنبى ده هيقول

أنااااااااا سفااااااااااااح المعاااااااااادى
قولت لا مستحيل يحصل كدة
و طبعاً الرعب بقى بيلعب ماتش كورة فى قلبى..هههههههههه
لكن انا بقى قولت ما اتكلم و اقول حاجة
روحت قايل للى جنبى ده معلش خليها عليك دا السواق شقيان من الصبح..هههههه
قالى تعبان ميشتغلش..اوووووبس ...سكت خااااااااالص ليطلع الموس و يحلقلى
ههههههههههه
و أبتدى الكلام مع صاحبه اللى قاعد جنبه
لا و بيتكلموا عن السفاح
و ده يقوله اكيد انت فى الاخر هتطلع سفاح المعادى
و انا بقول لنفسى ما تيجى بسرعة يا رمسيس هههههههههه
المهم البنى آدم اللى جنبى ده كل شوية يحط ايده فى جيب الجاكت و يطلعها
وانا اقوووول خلاص هيطلع المطوة و يغزنى ههههههه
تعب اعصابى منه لله..كل شوية يحط ايده فى الجاكيت و يطلعها
لقيت واحد بيشاور للسواق من الشارع
بيقوله المنتصر..سمعتها كدة
قاله لا رمسيس المنتصر من الناحية التانية
و الراجل اللى كان هيركب ده كااااااااان شارب و متنيل على عينه
مش عارف هيعدى الطريق ازاى
انا قولت فى نفسى هى ناقصة واحد سكران كماااااااااان
المهم حمدت ربنا انه مركبش
قولت لما العساكر فى كل مكان الراجل اللى شارب ده ماشى كدة ازاى؟
شوية و البنى آدم اللى جنبى صاحبه نزل و بعديه بشوية هو نزل
و قولت الحمدلله..أنا حى أنا حى أنا حى..هههههههههههه
نزلت فى رمسيس و ركبت ميكروباص للبيت
اول ما دخلت البيت بطلع الفلوس و الحاجة من جيبى
كما هو معتاد
ملقتش الفلوس....أوبس
طب المحمول...موجود الحمد لله
طب المحفظة..موجودة الحمد لله
و كانت دى اول مرة اروح فيها المعــــادى
بس اللى لاحظته ان الناس مصدقة اوووى موضوع السفاح
...و أخيراً و ليس أخراً
أوعـــــــــــــــى تروح المعـــــــــادى

...خلاويص؟ لسة

جه الخواجة اخترع المحمول..!! و أحنا اخترعنا أيه...؟؟
ناهيكم عن إنه اخترع قبل منه العربية و الطيارة

و الأسانسير و النووي و الستالايت و غطس في قاع البحر
!!..ودلدل رجليه علي القمر.. ولغاية شخشيخة حمادة و تغريد و قميص النوم الشفتشى
إيه..خلصت كدة.. نوتة الأختراعات فيصت و جابت أخرها خلاص..؟
يا نهار كوبيا.. أمال أحنا هنخترع إيه..؟؟
طب و بعدين يا جدعان.. حنفضل مأنتخين في لعبة الأستغماية دي كدة ومصدرين روحنا
في الحيطة و عمالين نقول خلاويص و هما يقولوا لسة..؟
..أظنه ما ينفعش
إذاً فعلينا بالــ..... بالإيه؟؟
..مش عارف الصراحة.. بس أكيد علينا بشئ علي طريقة الفنكوش كده
الشئ ده يطلع فلاية.. مقص.. مش مهم.. المهم يكون في شئ نذيع
ع العالم و نقول إحنا اخترعنا و نعمله حملة دعاية بنت كلاب و نقرع ع الكوكب كله
بإن من النهاردة أو بكرة أو يعني من اليوم

اللي حنفوق فيه من أنتخة الكنب الاسطمبولي
..بتاعنا ده , إنه ما عدش حد حيعرف يعيش بدونه
,فالعايش بدونه ميت,و من مات بدونه لم يموت

و من جاء بدونه لم يأت, ومن رحل بدونه لم يذهب
(( و من أكل لم يشبع ومن شرب لم يكرع و هكذا (( دواليب

..و طبيعي إن العروض حترف علينا عاوزين يشتروا (( بدونه )) ده
..و طبعاً الأن لا عندنا (( بدونه )) ولا دياولو
- مع إن تصدقوا ممكن يكون عندنا دياولو و مش واخدين بالنا-
Egoفنلعب لعبة التعجيز, و أظنه ده ملعبنا و نسنتر نفسنا علي كومبريسور الــ
..و ننفخ في روحنا ع الآخر ولا عجل المحرات و نعلنها مدوية
أصل ف الحقيقة يا خواجة الـ بدونه ده مش أي حد و مش أي شعب و مش أي وطن
..حيعرف يستعمله أو يتعامل معاه
الـ بدونه محتاج عقلية و طريقة تعامل و إيقاع مختلف عن كل اللي البشرية قابلته
..ف سكتها أو حط ع الكوكب من أيام الثورة الصناعية
..و لأنه خواجة عنيد و حسود و حيستكتر علينا حتة بدونه
..فحيعمل اللالي علشان يعرف ده إيه
..مرة بالترغيب و مرات بالترهيب, و احنا متمسكين بسر اختراعنا
..طبعا ,ده هو اللي حيلتنا ف الدنيا
و نكاية فيه يعلن النظام عن حقيبة وزارية جديدة
- إنشاله حتي حقيبة هاندباج و لو مفيش.. كيس بلاستيك ينفع-
..و يشيله وزير حنجوري ضريب خناجر كده
..و يبقي اول وزير لوزارة الـ بدونه
..و عربية تجيبه وعربية توديه و يقف ع المايك و يقول و يغني علي الشعوب
(( لن نحيا بدونه.. لن يكون بدونه.. لن ( أي حاجة ) بدونه ))
..و أكيد متلهفين زي الخواجة عشان تعرفوا إيه هو الـ بدونه
..اللي هيتولد في مصر المحروتة و يكبر و يحلم و يقابل و يأنتخ و يستأنتخ سبع أناتيخ
..و ما يفهمش أختراع البدونه
!!يبقي لامؤخذة عايش بدونه

بقلم هشام هلال

كريم أتسجن..أحسن

كريم عامر..شاب مصرى ..تعلم بالتعليم الأزهرى طيلة سنوات حياته
الى ان حاول الهروب من تحت مظله التعليم الأزهرى
التى لم يكن يفضل الوجود تحتها..لأنها لم تكن فى اتجاه افكاره العلمانية
كريم عامر..بدأ التدوين و وجد فى المدونات المكان الوحيد
..للتعبير عن افكاره العلمانية
كانت تدوينات كريم تدل على مدى الحقد الذى تربا بداخله
من التعليم الأزهرى او بالأصح التعليم الدينى
فبدأ كريم بمهاجمة جامعة الازهر و التعليم الأزهرى عموماً
و تمادى فى ذلك الى ان سب سيدنا محمد
صلى الله عليه و سلم
و تمادى اكثر من ذلك فشكك فى المعتقدات الأسلامية
و جاء على حد قوله..أن شهر رمضان هو شهر النفاق
بل الأكثر من ذلك..أنه دعا كل من يقرا مدونته
.أن يفطروا فى رمضان جهاراً أمام الجميع
أنا لا مع كريم ولا ضدده
أنا بسأل سؤال و هحاول اجاوب أجوبة منطقية
السؤال هو –
هل نظام التعليم الأزهرى هو المسؤول عن تطرف كريم الى ذلك الحد؟
أعتقد ان الأزهر الذى أخرج للعالم بأثره
علماء ساعدوا فى نهضة الدنيا كلها و كانوا منارة لكل من جاء بعدهم
لا اتخيل يوماً ان الازهر الذى أخرج
الأمام محمد عبده..هو من خرج منه كريم بأفكاره تلك
المعادية لكل ما هو مسلم
و لا استطيع ان استوعب ان شاب يدرس بالتعليم الازهرى
( و يقول ان رسول الله ( صلى الله عليه وسلم
..أرهابى و ان الصحابة كانوا ارهابين
انا لم اكن اعلم شئ عن كريم قبل ان اعلم خبر الحكم عليه
قرات مرة فى تدوينته و لكنى لم اخذ الموضوع
بمحمل الجد..بل قولت فى نفسى
ربنا يهديك
عندما علمت خبر الحكم بالسجن لمدة ثلاث سنوات
على كريم عامر الشهير بـ عبد الكريم
كنت كلما اقول لأحد من اصدقائى
كريم اتحكم عليه و اتسجن
:يرد بسرعة و من غير تفكير و يقول
...أحسن
لكن انا مش عارف أيه سبب
ان يتساوى الرسول صلى الله عليه و سلم
...و مبارك
يعنى كل العنوين اللى ظهرت وقت الخبر
:كانت بتقول
الحكم على عبد الكريم بالسجن لسب الرسول و مبارك
كل اللى غيظنى فى الموضوع ان يتحط الأسمين جنب بعض
و تبقى التهمة دى مساوية لتهمة دى
مين هو مبارك يعنى علشان نحط اسمه جنب
سيدنا محمد صلى الله عليه و سلم
اشرف خلق الله؟
لكن انا مش خايف من ان كريم لما يتحبس و نقف ضدده
فأحنا كدة بنكون بنقف ضدد بعض او ضدد فكرة الحرية على النت
لكن انا رأى ان لو التدوين هو اللى عمله كريم ده
أنا اتوقف عن التدوين من الآن و اقفل المدونة الى الأبد
خير لى من ان اخسر نفسى و دينى و اهلى
و من الطبيعى ان كلنا هنتحبس سواء وقفنا جنب كريم
او وقفنا ضدده
...و على الدنيا السلام

حريق محدود..و كله تحت السيطرة

..كنت يوم راجع من الجامعة و لقيت حريق بجوار منزل أحد أصدقائى
أتجهنا الى مكان الحريق الحمدلله كان بعيد عن منطقة سكن أصدقائى
وانا جى من اول الشارع كدة..لقيت ناس واقفة بتتفرج
أنا جريت و كان معايا محمد صديقى روحنا نشوف فيه ايه؟
لقينا عمارة و موجود على السطح بتعها تندة بلاستك كدة
و التندة والع فيها النار..
بس بصراحة لما وصلت لمكان الحريق لقيت عربيات الشرطة موجودة
و عربيات المطافى اللى عاملة زى الجبل
بتدور على مكان تدخل للحريق منه..
طبعا ده لسببين..
السبب الاول: أن العربيات بتاعت المطافى كبيرة زيادة عن اللازم
و الشوارع مش واسعة للدرجة دى.
السبب التانى: أن اصحاب العربيات ركنين العربيات بتعتهم على الجنبين فى الشارع
دا غير واحد رخم راكن العربية بتعته بطريقة غريبة
قفلت الشارع خالص..
المهم تواجد فى مكان الحريق يجى ثلاث عربيات شرطة..مش عارف ليه؟
و أربع عربيات مطافى كل عربية منهم بسم الله مشاء الله..
لا و اللى يخلى الواحد يتفرس..ان الثلاث عربيات بتوع المطافى
..اللى حضروا لمكان الحريق كانوا غير مجهزين لأطفاء الحريق
طب جاين يعملوا ايه؟؟؟؟؟؟؟
وقف الناس من اهالى المنطقة يشاهدون الحريق
..و يشاهدون التندة و هى تتأكل و مازلنا فى انتظار العربية المجهزة
طبعا مش هقولكم المجهود الخرافى اللى بذله رجال الشرطة
((فى أبعاد الأطفال الصغيرة عن المكان (( العيال يعنى
..و لم يجد رجال الشرطة الأ ان يوجهون السباب اللى الاطفال
(أمشى يا ابن الكـــ ...كدة يعنى)
و طبعاً العيال فرحانة و عمالة تجرى من مكان لمكان
و احنا فى أنتظار العربية الرابعة المجهزة
طبعارجال المن بيشوفوا شغلهم

و رجال المطافى بيشوفوا شغلهم

و انا كمان بشوف شغلى و بصور

هههههههههه

و لقيت واحد بيقولى ..أنت بتصور أيه؟؟
و مضايق أووووى
قولت له : يعنى حضرتك عايزنى أصور ايه؟
قال : بس دى مصايب و متتصورش يعنى.
..قولت: ما هى لازم تتصور علشان متتكررش تانى و نتفادة حدوثها بعدين
و كملت و قولت: أصلا أنا مش بصور جثث ناس محروقة..انا بصور تندة بتتحرق
..و الناس واقفة بتتفرج
.المهم سكت..و قال : مصائب قوم عند قوم فوائد
( بصتله كدة و كملت تصوير( ههههههه
..لا و حدث موقف طريف
المفروض العربية الرابعة اللى احنا فى انتظارها دى
سيارة مطافى مجهزة لأطفاء الحريق الناتج عن ماس كهربى
( يعنى مش بتستخدم المياه..بتستخدم الغاز او البودر )
جت سيارة شرطة زى اللى هتشفوها فى الفيديو
محمد صاحبى سمع عسكرى بيقول هى دى عربية الغاز؟
طبعاً الموقف مينفعش نضحك فيه أبداً
ههههههههههه
جت سيارة المطافى الرابعة و أتضح انها لا سيارة غاز ولا بودر
دى السيارة اللى بيكون فيها سلم متحرك لأعلى
ههههههههههه
جت السيارة و اتفرد السلم و الناس مبسوطة اووووى
هههههههههههه
و طلع فرد من افراد المطافى على السلم
و اتفتحت المياه فى الخرطوم
..اللى مخدش دقيقة يا دوبك الشقة غرقت ماية
دا بعد ما كان فرد اخر من المطافى طلع وقت أنتظار السيارة
..و كسر الجزء المشتعل فى التندة
و بس خلاص الحريقة اطفت فى دقيقة
هههههههههه
كان ليه بقى عربيات الشرطة الكتيرة
( كان كفاية عربية واحدة..( هههههههه
و كان ليه الثلاث عربيات بتوع المطافى اللى معملوش حاجة؟
كل ده علشان المنطقة دى يسكنها مراكز مرموقة..
و كل ده علشان نخرج نقول..
حريق محدود..و كله تحت السيطرة
(( أرحمنا يا رب...هههههههه ))