يسقط يسقط حكم العسكر

April 10, 2007

رحلتى الى رأس سدر

شاطئ رأس سدر


اليوم : السبت
التاريخ : 7 / 4 / 2007
الحدث : رحلة الى رأس سدر بالبحر الاحمر
بدأ اليوم بأنى نمت الساعة 3 الفجر كدة و صحيت الساعة 5 الفجر
خدت دوش و لبست هدومى و كانت والدتى بتحضرلى الاكل اللى هاخده معايا
خدت كل حاجتى اللى هروح بيها الرحلة و نزلت على 6 صباحاً كدة
وصلت لمحمد
صديقى الساعة 6 و ربع
نزل من العمارة بتعته على 6 و نص
...و كل ده انا مستنيه
نزل محمد و روحنا لباقى أصحابنا
علاء و ابراهيم
لقينا ابراهيم واقف تحت عمارة علاء
و لقيت علاء لسة نازل حالاً من البيت
لقيته بيفتح العربية بتاعت والده
و بيحط حاجته فيها
روحت انا داخل فيه شمال قبل ما يقولى أتأخرت ليه؟
قولتله دى موعيد يا علاء؟
قالى معلش
قلتله هو والدك هيوصلنا بالجرادة دى
( الجرادة = سيارة والد علاء )
راح علاء قالى ايوة
قلتله أوك
روحت اجيب كانز لينا نخده معانا
و سألت :
أجبلك يا محمد؟
رد : ايوة
أجبلك يا ابراهيم؟
رد : ايوة
أجبلك يا علاء؟
...رد رد مختلف عنهم خالص و قال
أيوة
ههههههههههههههههه
المهم جبت الكانز
و روحت لقيت والد علاء نزل
و بيسخن العربية
راح ابراهيم قايل لعلاء
أحنا ناخدها ماشى أحسن
هههههههههههههه
المهم ركبنا الجرادة
و اتجهنا الى باب الجامعة
( حلوة اتجهنا دى )
نزلنا عند باب كلية أداب
و عدينا الطريق علشان نروح قدام بابا تجارة
وقفنا قدام باب تجارة
و كلمنا شريف و عمرو
قالوا انهم جاين فى السكة
وقفنا شوية كدة
و جه شريف و عمرو
شريف جاى معاه كورة
خدنها و قاعدنا نلعب
شريف كلم زيزو
( زيزو اللى منظم الرحلة )
قاله انا جاى و معايا الاتوبيس فى السكة
لقينا عمرو بيبرس
صاحب زيزو
جاى سلمنا عليه و فضل واقف معانا لغاية
ما جه الاتوبيس
جه زيزو و معاه الاتوبيس
وقفنا شوية لغاية ما ينده علينا زيزو
نده علينا زيزو
و طلعنا تفحصنا البنات و كدة
كله تمام اخدنا مكانا و كدة
و شوية كدة و اتحرك الاتوبيس
كانت الساعة 8 و ربع كدة
قاعدنا نهزر و كدة بقى
و اول ما خرجنا من القاهرة
و بقينا على طريق البحر الاحمر
و لقينا عاصفة رملية
و بقينا مش شيفين اى حاجة
لا من شبابيك الأتوبيس
ولا من عند السواق
طبعاً كله اترعب

صورة من شباك الأتوبيس
مش شايفين اى عربية قدمنا
و فجاءة لقينا السواق بيفرمل
و لقينا عربية 128 قدمنا
كنا هنخبط فيها
لكن السواق فداها
كل الناس اترعبت
و لقينا ناس فى اخر الاتوبيس
بيقولوا للسواق
اقف ياسطى على جنب لغاية ما الشبورة تهدى
طبعاً السواق مينفعش يقف غير فى استراحة
لأنه لو وقف ممكن اى عربية تلبس فيه وش
من ورا
يعنى الوقوف أخطر من اننا نفضل ماشين
طبعاً مسمعش كلامهم و فضل ماشى
و كنا هنلبس فى عربية نقل تانى
لكن ربنا ستر
و قدر السواق يفادى العربية
الناس اترعبت و كان الناس
قبل العاصفة الرملية دى
بتغنى و ترقص و كدة
و كان زيزو مشغل اغانى
فى كاسيت الاتوبيس
بعد ما كنا هنخبط فى الـ 128
السواق قفل الكاسيت
و شغل قرءان
و الناس اللى كانت بترقص و تغنى
بقى كله باصص للطريق
و الصمت عم على الاتوبيس
و اللى يتشاهد
و اللى يقول يا رب
و كدة يعنى
ما هو الناس بتعرف ربنا فى وقت الشدة
شوية كدة ووصلنا للريست
نزلنا كدة علشان نحرك رجلينا و كدة


صورة من شباك الأتوبيس


و هوب عاصفة رملية
و اتبهدلنا طبعاً
WC دخلنا الـ
و مكناش عايزين نخرج منه
و انا خارج بكلم العامل بتاع الحمام
بيقولى انتم رايحين شرم؟
قلتله لا احنا رايحين راس سدر
رحلة وكدة
قالى و هتقعدوا كام يوم؟
قلتله لا احنا راجعين انهاردة بردوا
قالى ازاى دا انتم عقبال ما توصلوا عقبال ما هتروحوا
قلتله عادى يعنى بس المشكلة فى التراب
احنا مش شايفين حاجة و احنا فى السكة
قالى ربنا معاكم
و قلتله السلام عليكم
و روحت اركب انا و اصحابى.
كل الناس عمالة تقول للسواق على مهلك
و كدة علشان نوصل بالسلامة
بصراحة السواق سواق بجد
لولا عناية الله

( TVزى ما بيقولوا فى الـ )
ثم السواق
كنا موتنا اكيد
كمل السواق الطريق
و التراب خف شوية و بقى الطريق كويس
و رجع الناس تغنى تانى و ترقص


صورة من شباك الأتوبيس
و زيزو راح شغل كاسيت الاتوبيس
و رجعت ريما لعادتها القديمة
ههههههههههه
وصلنا القرية الساعة 12 الضهر كدة
طبيعى يعنى علشان كنا مشين بسرعة
قليلة علشان ربنا يسترها معانا
وصلنا القرية اسمها
جولدن بيتش
و نزل زيزو يكلم مع الامن اللى على البوابة و كدة
شوية كدة نقول عشر دقائق
و رجع زيزو و ساعقنا كلنا
و قال :
يا جماعة معلش القرية قفلت علشان الاحوال الجوية
و الموظفين اللى فيها مشيوا
..و هنشوف قرية تانية
طبعاً مفيش كلام يتقال
ما علينا
رجعنا 10 كيلو كدة علشان ندخل قرية تانية
وصلنا لقرية اسمها
عيون موسى
على الساعة 1 الضهر
نزل زيزو يكلم الادارة و كدة
قعد يجى 10 دقائق كمان
انا زهقت من الاتوبيس
قولت لصحابى هاتوا الكرة و تعالوا نلعب تحت شوية
نزلت و نزلوا ورايا
و اول ما نزلنا الكرة على الارض
الهوا خدها و جريت
هههههههههه
قعدت اجرى وراها
و اول ما جبتها لقيت عمرو بيبرس
بيقول يلا يا جماعة على الاتوبيس
علشان القرية وافقت اننا ندخل
ركبنا و دخلنا القرية بالأتوبيس

...داخل القرية
دخلنا القرية॥و بقينا ماشين فى القرية زى اللى تايهين فى الصحرا
عارفين مسلسل يوميات ونيس..لما تاهوا و الكل كان بيدور على التانى
كنا احنا كدة
اول ما دخلنا روحنا على شاطئ القرية
مياه البحر كان شكلها حلو اوووووووى
المهم كنا ماشين مع زيزو و بيبرس
قلولنا هنروح احنا للأدارة نخلص معاهم و كدة
و سابونا عند الشاطئ
فأحنا قولنا لبعض تعالى ندور على حتة نغير فيها هدومنا
مشينا بقى زى التايهين
و الشمس مشاء الله عليها..كادت ان تحرقنا
و احنا ماشين لاقينا على صاحب بيبرس و زيزو
مشينا وراه..قولنا دا رايح اكيد يغير
فضلنا ماشين وراه
و فجاءة مش لاقين على
فين يا جماعة الراجل اللى كنا ماشين وراه؟
لقينا نفسنا قدام مطعم..دخلنا
و كلنا ماشين ورا بعض و منظرنا تحفة
لقينا بنات جاين ورانا
كلنا ماشين ورا بعض و محدش عارف اى حاجة
دخلنا المطعم
و طلعنا الدور التانى ورا بعض زى النمل
لقينا واحد كدة جرسون
قالنا : التوليت ده تبع المطعم.
رجعنا تانى و خرجنا فى رحلة البحث عن مكان نغير فيه..
نلاقى حد من اللى معانا رايح
نروح معاه
نلاقى حد راجع
نرجع معاه
كانت الساعة 1 و نص كدة
و الشمس طبعاً معندهاش دم
لقينا بسين صغير كدة
قولنا ندخل يمكن نلاقى مكان نغير فيه..
دخل شريف صاحبى
فى قنطرة كدة شكلها ظريف
عداها شريف و راح عند البسين
قالوله مفيش مكان تغير فيه هنا
رجع شريف و قالنا
روحنا قاعدين على سلم القنطرة دى
و طلعنا السندوتشات
و قاعدنا ناكل و نتفرج على الناس اللى
كانت معانا و هما رايحين جاين
هههههههه
طبعا اللى كان متقل ولابس هدوم تقيلة
خفف الهدوم و قلع التى شيرت ولبس القط
انا من اول الرحلة لابس قط
هههههههه
مكنتش محتاج اغير
بعد ما قعدنا يجى عشر دقايق كدة
قولنا نروح عند الشاطئ يمكن نلاقى زيزو
و بالفعل واحنا فى الطريق للشاطئ
لقينا زيزو و بيبرس
قولنلهم عايزين نغير هدومنا
قلولنا احنا جبنا شليه علشان تغيروا فيه و تسيبوا حاجتكم
المهم ادانا رقم الشاليه..
و ابتدت رحلة تانية فى البحث عن الشاليه
هههههههه
الشاليه كان يبعد عن الشاطئ مسافة كبيرة
المهم بعد معاناه وصلنا الشاليه
كان جنبنا الشاليه بتاع البنات
( هما كانو 2 شاليه..واحد بنات و التانى صبيان )
المضحك بقى..
ان زيزو و بيبرس و هما بيدونا رقم الشاليه
بيقولوا الشاليه ده لينا احنا بس
متقولوش لحد علشان نبقى فيه لوحدنا
قولنا اوك
اضحك بقى من اول هنا
روحنا عند الشاليه و خبطنا على الباب
الباب اتفتح..
و جاين ندخل
لقينا ناس كتير قاعدة فى الشاليه
ههههههههه
مين دول دا زيزو قايل مفيش غيرنا احنا بس
طبعاً اتفاجئنا بالصبيان اللى كانوا معانا فى الاتوبيس
معظمهم فى الشاليه
هههههههههه
كانت الساعة 2 و ربع كدة
شريف اول ما دخل الشاليه فتح التلاجة يستكشف
لقى أزازة وسكى 42.5 %
هههههههه
و علبتين بيرة سقارة 10 %
هههههههه
قال القرية دى باين عليها محترمة اوووووى
ههههههههه
راح شريف قال يلا يا جماعة اجهزوا كدة
و اتوضوا علشان هنصلى الضهر و العصر قصر
دخل كل واحد منا يغير و يتوضى و يخرج
فى الوقت ده كان ازازة الوسكى اتفتحت برا
و البانجو و الحشيش بيتلف
و الجماعة بتشرب
هههههههههه
ناس بتتوضى و ناس .....
كنت بتزضى و خرجت لقيت الدخان وكدة
قولت سبحان الله
كلنا اتوضينا
انا و علاء و محمد و ابراهيم و عمرو و كان السواق معانا
بس اتوضا بعد نفسين الحشيش اللى خادهم
هههههههههه
نوينا الصلاة
و قولنلهم يلا كله يدخل على القوضة اللى جوة و حاجته معاه
( سيجارة - أزازة - كدة يعنى )
علشان نعرف نصلى
كلهم دخلوا القوضة اللى جوة
و نوينا الصلاة
و قبل ماننوى الصلاة
دار حوار بين السواق و زيزو
زيزو بيقول للسواق ازاى هتصلى و انت لسة شارب حشيش؟
السواق قاله عادى يعنى انا مش سكران
انا فايق و بكلمك اهوه
هههههههههههه
راح زيزو قايل يا جماعة طب مين هيبقى الامام
هههههههههههه
بيلقح على السواق
قولنا عادى هيصلى بينا امام و هو اللى هيشيل الوزر
طبعا زيزو مصلاش معانا علشان كان بيشرب فى القوضة التانية
بدأنا الصلاة
و تخيل بقى..هسيبك لخيالك
شاليه واحد
قوضة بيتشرب فيها حشيش و بانجو و وسكى و بيرة
و الصالة احنا بنصلى فيها..
ههههههههههههههههه
خلصنا الصلاة و كل واحد فينا قلع
كان المنظر جامد جدا
اه والله كله لابس البنطلون و تحتيه الشورت
اول ما خلصنا الصلاة
كله قلع البنطلون..مع بعض كدة كان المنظر
كأننا فى فيلم
الطريق الى ايلات
ههههههههههههه
نزلنا من الشاليه و أتجهنا الى الشاطئ
روحنا على الشاطئ و لقينا الدى جى اشتغل
قعدنا نرقص ..و محدش يقولى رقصت ولا لا
علشان بكسف
ههههههههههه
و اثناء ما كان الرقص شغال
قولت لمحمد صاحبى انا هنزل البحر
و روحت جريت على البحر و قلعت التى شيرت
زى الافلام كدة..وانا بجرى
و روحت نازل البحر
و لقيت محمد جاى ورايا
مش قادر اقولكم
الماية كنت تلج
مع ان الشمس كنت حارقة
بجد الماية كانت تلج و مش ببالغ
قولت استنى شوية علشان انا لسة نازل و كدة
دقيقتين كدة و مقدرتش
قولت لمحمد لا ياعم نطلع نرقص احسن
هههههههههه
طلعنا و روحنا على الدى جى
و محدش يكسفنى تانى و يقولى رقصت ولا لأ
هههههههههه
فاكرين البنت اللى كانت عايزة تدخل الحمام
و احنا فى الاتوبيس
جه دورها بقى
و الرقص اشتغل..و اوعى بقى الرقص
هى و صحبتها كانوا مبهدلين الدنيا
و انا طبعاً كنت محترم و معملتش اى حاجة
( يعنى لازم اقول كدة..هههههههههه )
زهقنا من الرقص قولنا يلا بينا على البسين
مشينا بقى و اتجهنا للبسين
( اتجهنا تانى..ههههههههه)
روحنا البسين
و نزلنا و البنتين نزلوا معانا
و كنا بنلعب كرة مائية
قسمنا بعض فريقين
و لعبنا لعب
ههههههههههه
المضحك بقى اننا كل شوية
حد يجيله شد عضلى و بالذات فى عضلة السمانة
و يطلع و يقعد على سور البسين
واحد طلع
شوية ولقيت جنبه واحد تانى
شوية و جالى انا كمان شد و طلعت قعدت جنبهم
كان شكلنا وحش اووووووووى
هههههههه
هما لما الشد اللى عندهم فك نزلوا تانى
( يعنى بنات و كدة فرصة لا تعوض )
انا قولت خلاص شكراً كدة
بدل ما انزل و يجيلى شد فى التانية
و اروح على نقالة
ههههههههه
قعدت اتفرج عليهم من فوق و اصور و كدة
الصور هتنزل متقلقوش
هههههههههه
شوية كدة و طلعوا علشان يكلوا
كل واحد فى ايده سندويتش
و مش لاقين ماية نشرب
راح شريف مطلع الكان السقارة
و ادها لزيزو راح زيزو فاتح و شرب
قعدنا نكلم شوية و احنا بناكل كدة
و لقتهم بيقولوا هننزل تانى
ههههههههه
نزلوا تانى انا ريحت دماغى و قعدت فوق اتفرج
محدش يسألنى على ايه؟
بتفرج وخلاص
ههههههه
نزلوا تانى و عملوا مسابقة فى الغطس
و زيزو هو اللى كسب
طلعوا بعد المسابقة
و قولنا نروح نرقص شوية فى الدى جى
كانت الساعة 5 كدة
روحنا رقصنا و هيصنا
هههههه
و لعبنا لعبة المنديل على الشاطئ
محدش يسأل ليه اللعبة دى بالذات
ههههههههههههه
خلصنا لعب و زيزو و بيبرس
كل واحد خد بنت من البنتين على انفراد
كان فى موضوع عائلى كدة
هههههههههه
روحت انا و اصحابى الشاليه ناخد دوش و نغير وكدة
طلعنا الشاليه
لقينا ولد نايم
هههههههههههه
و ناس بتلعب أستميشن
و التكيف شغال و الحياه فل
دخلنا ورا بعض كدة كل واحد ياخد دوش و يغير
جه الشاب اللى اسمه على و طلع الشاليه و كدة
و بيكلم بصوت عالى
فبقوله وطى صوتك علشان زيزو نايم
( دا زيزو غير التانى )
قالى يعنى هو عنده أمتحان ثانوية عامة بكرة
هههههههههه
راح قايله اصحى يابنى انت جاى تنام
هههههههههه
خلصنا لبس و ظبطنا نفسنا جل و كريم و برفان
ههههههه
و نزلنا من الشاليه
و روحنا علشان نركب الاتوبيس
و احنا ماشين كان ماتش الاهلى و صن داونز
بيبتدى و الناس كانت قاعدة فى المطعم
هو مطعم مفتوح
( مش مغلق يعنى )
عدينا وسط الناس و لقينا شلة ظريفة بتقول رابطة الاهلى اهه
طبعاً بصنلهم بقرف و احنا ماشين
هههههههههه
عارفين انتم بقى العيال الفافى بتاعت بابا و ماما دى
ههههههههههههه
و روحنا ركبنا الأتوبيس
و يا ريتنا ما ركبنا الأتوبيس
( استنوا الجزء الاخيرة..الأتوبيس و اللى حصل فيه )



3 comment:

Unknown said...

يااااااااااااااااااااااه
كنت فاكرة انى انا بس اللى برغى
الحمد لله
مطلعتش انا لوحدى
بس بجد اسلوبك تحفة ودمك زى العسل
وقرأته على مرة واحدة مأخدتش ريست

Unknown said...

طب كويس انك لاقيتى واحد رغاى زيك ههههه
الموضوع ليه تكملة بس انا مكسل اكتبها
هيعجبك اكتر لما يكمل
و كلك زوق يا دودش هانم
ههههههه
و زورينا ديماً و متحرمناش منك

اٍبتسامة القمر said...

اها تحس انها سيره ذاتيه لموقف وباستفاضه
تسلم ايدك يا مادى
حلو طريقة السرد دى