يسقط يسقط حكم العسكر

March 4, 2008

موبيلى..أتسرق

زى انهاردة الأسبوع اللى فات ايوة صح يوم التلات
دخلت اصلى الضهر مع باسم و بسام و شريف
فى مسجد كلية اداب
قلعت الجاكيت علشان اتوضى..لقيت شريف بيحط الجاكيت بتاعه على الشماعة
لسة هيحط الجاكيت الشماعة وقعت
المهم حطيت الجاكيت فى اخر المسجد جنب جاكيت بسام
و شريف حط الجاكيت بتاعه جنب شنطته
دخلنا اتوضينا و صلينا الضهر
روحت علشان اخد الجاكيت
لقيت زى ما يكون حد حط ايده فى الجاكيت
خدت الجاكيت من على الارض و بحط ايدى فى الجيب
!!...مش لاقيت الموبيل
!سألت شريف انت اخدت الموبيل..؟
قالى لا
!سألت باسم انت أخدت الموبيل..؟
قالى لا
!سألت بسام انت أخدت الموبيل..؟
قالى لا
قولت الحمد لله
و اقعدت اقول استغفر الله العظيم استغفر الله العظيم
علشان الشيطان ميخلنيش اظن فى حد
و احنا على باب المسجد
شريف سأل الشاب اللى بيأذن للصلاة و قاله ان الموبيل ضاع وكدة
وقاله لو حد لاقاه يخليه معاه
و خرجنا من المسجد
و روحت انا و شريف لأمن كلية اداب
و قولنلهم قالوا روحوا قسم الوايلى
شريف قالى نتأكد كمان تعالى نروح للأمن كلية حقوق
روحنا و قالوا نفس الكلام
خرجنا من الجامعة انا و شريف و روحنا قسم الوايلى
امين الشرطة قال لازم السيريل نمبر
و مكنش معايا السيريل وقتها
قلت لشريف خلاص بكرة نبقى نعمل المحضر لما اجيب السيريل
تانى يوم يوم الأربعاء كان عندنا حفلة فى الجامعة
!!..حفلة مصطفى قمر..تضامناً مع أطفال غزة
المهم خرجنا انا و شريف و عطية روحنا القسم
عملنا المحضر و خرجنا رجعنا الجامعة تانى
و التهيس شغال و الضحك لدرجة اننا كنا بنضحك واحنا فى القسم
المهم محمد اخويا كلم واحد فى شارع عبد العزيز و قاله انه ممكن يرجعلى الموبيل
اتصلت بيه و اديته السيريل نمبر و يا ربنا يرجع الموبيل على ايده
ان شاء الله
أما بقى عن موبيلى حبيبى روح قلبى
فهو وحشنى اوى
و هموت وامسكه تانى
الموبيل ده ليه معايا ذكريات مش هقدر انساها
وحشتنى يا موبيلى
و يارب ترجعلى تانى
قولوا آمين

9 comment:

عاشقة القمر said...

ايه ده .. ده انا اول كومينت .. يارب دايما كده وربنا مايحرمك من ردودي ابدا :)
ياعيني يا ايجو والله انت ما تعرفش انت صعبان عليا قد ايه .. بس ان شاء الله يرجعلك بالسلامة وتحافظ عليه بقى ومش تحطه في الجاكيت تاني وانت هتسيبه .. عشان ما يزعلش منك ويتسرق .. ربنا يرجعهولك عن قريب وتكتب موضوع فيه حفلة رجوعه وارد عليه اول واحدة برضو ..

MadYAdeL said...

هو يرجع بس وانا
أكله كل يوم من كنتاكى
و أشربه كل يوم فيروز اناناس
و احطه جوا قلبى
واقفل عليه
دا غالى عندى قوى
:D
بيرو مش قادر اقولك قد ايه بترفعى روحى المعنوية
:)

Roka said...

صعبت عليه جداااااا
و قلبى اتقطع حوالى حتتبن و نص عليك . يا عينى عليك يا خوية .
قولى بقى ليه هيستوا فى اخر اليوم :@ منت كنت مبوز و عامل كدهه .. اخر زمن

Da VinCi said...

معلش يا ايجو متزعلش .. اناعارف اد ايه انت بتحب الموبايل ده .. ان شاء الله يرجع وتلاقيه مخلف موبايل صغنون بيقولو يا بابا :d
.. معلش يا ايجو ان شاء الله يرجع

MadYAdeL said...

Roka said...
صعبت عليه جداااااا
و قلبى اتقطع حوالى حتتبن و نص عليك . يا عينى عليك يا خوية .
قولى بقى ليه هيستوا فى اخر اليوم :@ منت كنت مبوز و عامل كدهه .. اخر زمن
...................
هيسنا واحنا فى القسم
و بوزت لما رجعت
:D
نورتى المدونة يا روكا

MadYAdeL said...

Da VinCi said...
معلش يا ايجو متزعلش .. اناعارف اد ايه انت بتحب الموبايل ده .. ان شاء الله يرجع وتلاقيه مخلف موبايل صغنون بيقولو يا بابا :d
.. معلش يا ايجو ان شاء الله يرجع
.................................
يا رب يا دافينشى يا رب
يسمع منك ربنا
نورت المدونة يا دافينشى

maha miho said...

موبايلك؟؟؟؟؟؟؟؟؟؟؟؟؟
تؤ تؤ تؤ تؤ
بص،، هو انا كنت أصلا ناوية اقول حاجة كده شبه الخنقة انما فعلا صعبت عليا ومش هعرف اتخانق معاك
بص يا أحمد،، ربنا كبير واللي راح بيرجع واللي اتكسر يتدغدغ ما عنداش وقت نصلح
بس بجد بجد قدر الله وما شاء فعل وربنا ع الظالم

MadYAdeL said...

الحمدلله يا ميهو
و وجودك منور المدونة
ياريت يتسرق منى موبيل كل يوم
:D

اٍبتسامة القمر said...

معلش معلش
انا كنت حضرة الموقف ومصدقتش زى مانت عارف,متزعلش وطبعا احنا عارفين ان الموبايل مرجعش
معلش يا ايجو اكيد انت طنشت,واكيد
بردو عرفت انه مش هيرجع
وزى ما ماهيتاس قالت
قدر الله وما شاء فعل