يسقط يسقط حكم العسكر

March 19, 2008

الحياه..عيش و فينو


"ان فاتك الفينو أتمرمغ فى دقيقه"
مثل شعبى مصرى تطور الى هذا الشكل بعد ان أصبح رغيف الفينو
حلم صعب المنال يبذل المواطن المصرى قصارى جهده
للحصول عليه ناهيك عن رغيف العيش البلدى اللى فى ناس بتموت
فى الطوابير علشان تاخده
بجد مش بهرج ناس بتموت فى طوابير العيش
بعد معارك طاحنة من أجل الوصول لرغيف العيش.

الفينو و العيش البلدى على نفس الدرجة من الأهمية للشعب المصرى
الأ ان العيش البلدى يحفظ لنفسه دائماً مكان فى قلب المواطن المصرى وبطنه ايضاً

العيش البلدى لازم يكون على طبلية او مائدة طعام اى مواطن مصرى
حتى لو مكنش هيتاكل بس لازم يكون موجود..

اما الفينو فهو ضرورى لسندويتشات المدرسة زى ما اتعودنا كلنا
واحنا صغيرين ماما تعملك السندويتشات و تاخدها معاك المدرسة
سندويتشات لانشون جبنة بيضة جيبنة قريش بالطماطم كل طبقة وعلى قدها

و كلنا عارفين الحوار اللى بيدور صبيحة كل يوم فيه مدرسة
قبل ما تنزل من البيت مامتك تقولك
كل السندويتشات يا حمادة..وخلى بالك محدش ياخدها منك..واياك ترجع بالسندويتشات و كأن السندويتشات دى لو رجعت امك هتطلق مثلاً

ههههههههه

كلنا اتربينا على ان الشغل- العمل – الـwork اسمه أكل العيش
علشان كدة معنى كلمة العيش عند المصرين كبير اوى
و مصر البلد الوحيد اللى بيطلق على الخبز لقب ( العيش )
علشان كدة العيش فى مصر معناه كبير اوى

تعالى بقى نشوف التطور الطبيعى للفينو و العيش البلدى
صحيح هو احنا ليه بنقول على العيش ( العيش البلدى )
مع ان العيش بيتعمل بقمح مش مصرى يعنى امريكانى و رومانى و اخيرا سورى؟

المهم نرجع نشوف التطور
نبدأ بالفينو..فاكرين اغنية توت توت بتاعت عبد المنعم مدبولى؟
لما كان بيمسك رغيف فينوا كدة قد دراعه واكبر كمان..
رغيف الفينو ده فضل يصغر يصغر لحد ما بقى زى اللى فى الصور كدة


و كمان يا ريته فضل بـ 10 قروش زى زمان لا دا بيصغر و يغلى
واعتقد ان ميزة ان الحاجة تصغر و تغلى دا موجود فى مصر بس

فى مصر كل حاجة عملين منها ماكيت صغير كدة
زبادى..العلبة عبارة عن عينة تدوق بس
الشيكولاتة اللى كانت بـ 25 قرش بقت عينة صغيرة تدوق بس
كل حاجة بقت عينات دا حتى بـ 50 قرش فول بقوا عينة بردوا

رغيف الفينو اللى بقى بـ 15 قرش فى منطقة
و زيه بالظبط بـ 25 فى منطقة تانية
و رغيف العيش البلدى
اللى بـ 5 قروش اللى بيقولوا مدعوم
و العيش اللى بقى الـ 5 بجنيه بعد كدة الـ 4 بجنيه
بعد كدة الـ 3 بجنيه دلوقتى
شايفين الرغيف بيصغر بيصغر
طب مين اللى عمل فيه كدة
مين صاحب هذا الجرم التاريخى اللى لان يغفره الأجيال القادمة
و الحكومة ليها دعوة بالموضوع ده ولا زى باقى المواضيع لا تملك فيها صلاحيات!

و هل كان يستحق الموضوع ان الرئيس مبارك يأمر الجيش المصرى بحل مشكلة الطوابير اللى على افران العيش؟!

سؤال أخير..لما البلد دى محدش بيعرف يحل مشاكلها غير الجيش
ليه الحكومة دى موجودة و ليه الوزراء دول بيقبضوا ملاين؟!

طب ما نبقى نظام حكم عسكرى و نجيب عساكر يمسكوا البلد
و اهو بردوا هيفضل الرئيس مبارك القائد الأعلى للقوات المسلحة..

سؤال كمان علشان خاطر ربنا..الحكومة الكويتية استقالت علشان غلاء الأسعار
طب الحكومة المصرية معندهاش دم ولا ايه الحكاية..؟

8 comment:

عاشقة القمر said...

جاااااااامد جامد جدا يا ايجو اللي انت عامله في الفينو ده مهما دورت له على مقاسات هتلاقي كل حاجة تحطها جنبه اكبر منه ما تحاولش .. ده قرب يختفي اساسا .. ده كمان خطوة مش هيبقى فيه حكاية انك تروح تجيب فينو فتاخده في شنطة دي خاااااااالص لالالا انت هتروح تجيبة عمو هيقولك افتح جيبك .. يادوب هو الساندويتش قطمة .. هو احنا فاضيين برضو .. بعدين حكومة ايه اللي انت طالب منها الحلول دي .. ياخونا عيب علينا كده هيبقى كتير اوي على الحكومة وهنبقى بنطلب منها فوق طاقتها هما هيفكروا في إزاي يعقدونا ويخربوا بيوتنا ويبوظوا علينا حياتنا ولا لسه هيفكروا في حلول .. سيبوهم سيبوهم في اللي هما فيه وراهم مشغوليات كتييييير اصل لسه فيه مواطن واحد ماكتئبش فمش قادرين يسيبوه في حاله :)
شكرا يا ايجو على الموضوع الجامد اللي ماعتقدش انه هيبقى له نهاية طول ماهم شغالين علينا هلاقي الموضوع بتاعك ده بقى سلسلة مواضيع ويمكن تعمله مسلسل 360 حلقة زي المسلسلات الاسباني كده :)
سوري رغيت وطولت عليك ..

a.aTeYa said...

على رأى المثل .. "عيش "نا و شوفنا

:D

كراكيب said...

احممممممم احممم...كوتي كوتي
بعيداً عن اني كنت هكتب موضوع شبه ده
وبعيداً عن انك كنت عارف حاجة زي كدة وشفت الصورة عندي على الموبايل والـري نيم بتاعها كان اسمه رغيف الفينو بربع جنيه
وبعيداً عن رغيف العيش البلدي اللي انت حاطط صورته وشكله متاكل قبل كدة
بس انا ضحكت بصراحة والموضوع عجبني موووت ومقارنة العيش بالمشط تحفة جدا
وسيبك انت هو في يوم عيد ميلادك الجاي تروح تقول لباباك ها يا ابويا هديتي ايه بقىىىىى؟؟ يقولك انت اللي هتتعشى بالفينو النهارده
صدقني حايبقى من الحاجات الغالية اللي مش بتتجاب غير في المناسبات اللي بنحب نتفشخر بيها قدام الناس
حححححح وانا مالي وانا مالي انا جعانة وقايمة اكل جبنه بالبقسماط

Anonymous said...

حسبي الله ونعم الوكيل
يا ابني وجعت قلبي ع المسا هو انا ناقصة
بقولك ايه؟ نفسي نفسي أوريك طابور العيش اللي ف شارع السودان اللي بعدي عليه كل يوم كل يوم كل يوم
ايجو كوتي مادي احمد.. موضوعك دمه خفيف والتطور الحقيقي للفينو دخل دماغي وافكارك عجباني ومحضرالك مفاجأة
نيااااهاااااااااهاااااااا

Unknown said...

عاشقة القمر
...............
ههههههههههههههه
عندك حق
الحكومة هتفضلنا ليه يعنى؟
هو احنا الشعب اللى بتحكمه مثلا
لا طبعا
الحكومة المصرية بتعمل على رخاء المواطن الغربى
لكن المصرى ملهاش دعوة بيه
هو من بقيت اهلها؟
صحيح تخيلى مثلا
"الحياه..عيش و فينو"
الحلقة 340
ههههههههههههههههههههههههه
ربنا يستر علينا
و ميفضحناش اكتر ما احنا مفضوحين
نورتى يا بيرو يا عسل
و خليكى ديماً اول حد يرد كدة
;D

Unknown said...

a.aTeYa
.........
تصدق ياواد
جامد المثل و فى الجون ومعبر بجد
عيشنا و شوفنا
و ياما هنشوف من الحرامية
قصدى الحزب الوطنى
:D
نورت يا عطية
;D

Unknown said...

miro
..........
انا وريتك تاريخ الصور صح؟
و تانى احطهملك هنا
صور العيش البلدى تاريخها
11-01-08
و صور الفينو تاريخها
31-10-07
هاااااه
هاتى تاريخ الصور بتعتك ونشوف مين
حضر للموضوع قبل التانى
;)
ممكن بقى فى الفلانتين
الولد يجيب لحبيبته رغيف عيش بلدى
ههههههههههههه
و لو بيحبها اوى هيجبلها
رغيف فينو من ابو ربع جنيه
هههههههههههههه
و لما الاب يدخل على ولاده برغيف عيش بلدى
يضربوله 21 طلقة تحية
ههههههههههه
يالهوى على المسخرة اللى وصلت ليها مصر
يا رب ترجع مصر زى ما كانت زمان
واحلى
نورتى يا ميرو
;D

Unknown said...

maha miho
...........
والله كفاية عليا اسمع منك
الكلمتين الحلوين دول
و ليه اروح شارع السودان
علشان اشوف الطابور
ما اشوف المخبز اللى جانبى
:D
ربنا ما يحرمنى منك ومن كلامك
اللى زى العسل ده
و عرفت اللى فيها
ههههههههههه
قصدى على المفاجأة
تسلميلى واى حاجة
انا تحت امرك
يا قمر
;D