!يعنى كان لازم نقل أدبنا عليكم؟

!يعنى كان لازم نقل أدبنا عليكم؟

طبعا العنوان غريب
لكن هما كلمتين هقولهم واتكل على الله
اكيد كلنا صحينا انهاردة على خبر
الا وهو

مبارك يرفع الاجور 30% لمواجهة الغلاء

كل اللى عايز اقوله
هو لازم يتعمل اضراب و دوشة وهيصة علشان البشر دى تحس على دمها
يعنى لازم مظاهرات و وقفات احتجاجية علشان تمشى ارادة الشعب

دا مش اول خضوع من الحكومة لأرادة الشعب رغم انفها
(لو عليهم مش عايزين)
الخضوع السابق

محافظ دمياط يعلن أمام ٥ آلاف متظاهر: مصنع «أجريوم» سينتقل إلي السويس

و ده طبعا بعد ما مبارك قال متعملوش المصنع هنا واعملوه فى السويس
و اهل السويس يولعوا بقى لو معملوش وقفات احتجاجية
و تظاهرات وفرجوا العالم على قباحة النظام فى مصر

خضوع مبارك ليس منحة
خضوع الحكومة ليس سياسة
البلد دى فيها شعب
و الشعب هو اللى بيحكم
و هو المالك لكل شبر فى ام البلد دى

سؤال صغير؟
كان العلاوة دى هتتقرر لشعب و بالمقدار ده
30%
لو مكنش اتعمل اضراب 6 ابريل؟

سؤال كمان صغير
هل الرئيس مبارك كان هيأمر بنقل مصنع اجريوم من دمياط
لو كان الناس معملتش وقفات احتجاجية و تظاهرات لمدة شهرين
و هو ميكفيش النظام اسبوع تظاهر علشان يعرفوا راى الناس
ولا الدستور قال شهرين بردوا؟

احب اقول لنظام فى مصر
رئيساً و حكومة و حرامية
الشعب لسة عايش
ممتش من الاسمدة و القمح و البلاوى المسرطنة
اه الجسد بيموت
لكن حب مصر و حب العيشة النضيفة الكريمة لسة ما متش فينا

و اختم بـ صلاح جاهين

يا طير يا عالي في الســما طظ فيك ما تفتكرشي ربنا مصطـفيك