يسقط يسقط حكم العسكر

December 31, 2008

بلاش تشيلوا اسرائيل و تحطوا مصر

انا بقالى كذا يوم بصارع نفسى.. اكتب عن اللى بيحصل ده ولا لا
كل الناس بتكتب .. كله بيخون .. كله خايف على غزة .. كله عايز مصر تحارب
كله بيلخص اللى بيحصل فى غزة .. ان مصر هى المشكلة و المشكلة هى مصر
اختذلوا القضية كلها فى معبر
طب اذا اتفتح المعبر
اسرائيل هتوقف القصف؟
لما يكون المعبر مفتوح الصواريخ هتمتنع عن قتل الفلسطنين؟
ليفنى اعلنت الحرب على حماس من القاهرة
طب هو مين السبب فى ان ليفنى تعلن الحرب؟
مين اللى قال انا مش عايز تهدئة .. مش حماس؟
ليه عايزين مصر تتحمل خطأ حركة حماس مع الشعب الفلسطينى؟
اسئلة كتير لناس اللى بتفكر
انا كنت زى اى واحد بمشاعرى بقول مبارك خاين
الحكومة المصرية متواطئة مع اسرائيل
فكرت شوية .. سمعت تحليلات للموقف فى غزة .. قريت مقالات
سمعت و شوفت خطاب السيد حسن نصرالله
لقيت انى لازم افكر
اولا خطاب السيد حسن نصرالله
ايه ده؟
مش ده اللى اى واحد مصرى مستنيه من حزب الله
اى واحد مستنى قرار ان حزب الله هيقصف شمال اسرائيل بالصواريخ
لضغط على اسرائيل لوقف الحرب
لا السيد حسن نصرالله طالع يشحن العرب على النظام المصرى
طب يعنى هو الواحد يكون فى ايده بندقية و اخوه بيضرب و هو مش مقيد باى قيود
زى معاهدة سلام مثلا و يقول لأخوه التانى ادى اخونا اللى بيضرب اكل و معونات وافتح المعبر؟
كلام السيد حسن نصرالله للأسف جوابه الصواب ومش ده اللى كنا مستنينه منه
لأنه معملش بحديث الرسول صلى الله عليه وسلم
و هو لتقل خيراً او لتصمت
ثانياً الدول العربية الباقية اللى عايزة تبقشش من جيب مصر
اليمن : اقتحام السفارة المصرية ورفع علم فلسطين عليها
نسى الاخوة فى اليمن ان الجيش المصرى و شعب مصر
هما اللى خرجوا الاحتلال من اليمن
نسى الاخوة فى اليمن ان سبب من اسباب نكسة 67
هو ان الجيش المصرى كان فى اليمن
طلع الرئيس اليمنى يقول انا اسف و ان الفلسطنين هما اللى عملوا كدة
قطر و قناة الجزيرة : الحكومة القطرية ليها علاقات بأسرائيل
و من اقوى العلاقات العربية بأسرائيل هى دولة قطر
طب ليه مفيش ضغط منكم على اسرائيل؟ افراد الحكومة القطرية بيقضوا الاجازة فى اسرائيل ليه؟ ليفنى قامت بزيارة مقر قناة الجزيرة ليه؟ موفقين على قاعدة امريكية فى قطر ليه؟
باقى الدول العربية عريانين و عايزين يتغطوا بمصر
اللى فى ايده حاجة يعملها لغزة يعملها
مش مصر هى اللى هتشطف و تلبس بامبرز و تلبس هدوم كمان
الشعوب العربية اللى عايزة مصر تطرد السفير بتاع اسرائيل من مصر
ما يطالبوا حكمهم بنفس الطلب
الشعوب العربية اللى عايزة مصر تحارب
تقول لحكمها يحاربوا و احنا نحارب معاكم
لكن نحارب لوحدنا و نرجع قرن من الزمن لورا و تقفوا تتفرجوا علينا لا. اى عربى عنده كلمة عايز يقولها لمصر يروح يطالب بيها حكامه الاول
و لا هو خلاص بقى الحكام تستنكر و تدين و الشعوب تفترى على مصر؟
اسرائيل هى العدو
اسرائيل هى العدو
اسرائيل هى العدو
احرقوا سفارات اسرائيل فى بلادكم مش سفارات مصر
اسرائيل هى اللى بتضرب الشعب الفلسطينى مش مصر
اسرائيل اللى بتدبح مش مصر
شغلوا عقولكم و لو لمرة واحدة و بلاش تشيلوا اسرائيل و تحطوا مصر

2 comment:

عاشقة القمر said...

كلام ميه ميه يا واد يا ايجو .. انا قريت البوست ده اول ما نزلته واول ما قريته اتغظت من البلوج بتاعتك حتة غيظة مش قادرة اوصفهالك عشان كل ما احاول ارد على البوست تقولي اطلعي برا وضيعت كل اللي كان جوايا .. ماعلينا خلينا في اللي احنا فيه
كنت عايزة اقولك ان البوست بتاعك عجبني جداااااا لانه كان اول بوست اقراه من بعد اللي حصل لغزة ويقول كل اللي بفكر فيه .. انت تقريبا قولت اغلبية الكلام اللي كنت بفكر فيه وعايزة اقوله وبالذات حكاية مصر واللي المفروض تعمله ده .. كل واحد يطلع ويقول اللي المفروض على مصر انها تعمله طب وانتوا يا عم الحاج هتشاركوا بالدعاء يعني ولا بالأفكار مش فاهمه انا .. ولا مشاركتكم هتكون بإنكم تضيعوا وقتكوا الثمين وتقعدوا تتفرجوا .. ده حاجة تحرق الدم
فبجد كنت عايزة اقولك تسلم على البوست ده

Ego said...

ربنا يخليكى يا بيرو
و الحمدلله ان رأى العبد لله نال اعجابك