يـــا رب أيطـاليـــا

طبعاً كلكم هتستغربوا ايه العنوان اللي انا واضعه للتدوينة و هتموتوا و تعرفوا انا اقصد ايه

اللي متابع كاس العالم فاهم اني بتمني أيطاليا تفوز علي فرنسا و تاخد كاس العالم

و اللي مش متابع هيقول يمكن زهق من البلد زي باقي الشباب و عايز ياخد مركب و يهج علي أيطاليا

و فعلاً انا أقصد المعني الأول و المعني التاني

لكن أزاي أيطاليــا تكسب فرنســا؟

و أزاي أنا اهج من مصــر و أروح أيطاليا؟

الجواب علي السؤال الأول: هو ايطاليـا إن شــاء الله هتفوز مش علشان أنا عايز كدة

لكن علشان أيطاليــا فعلاً تستحق..واحد يطلع منكم زي الشجرة كدة و يقولي:طب ما فرنسا تستحق

و هيقولي فرنســا خرجت حامل اللقب..يقصد البرازيل ميقصدش واحدة حامل

و يقولي خرجت البرتغال.. برازيل أوربا

أقوم أنا أرد و أقول له: هي البرازيل حامل اللقب هي هي ولا كان فريق كفر أبو حمص

و البرتغال برازيل أوربا مكسبهاش عشرة صفر دا حيالله جون واحد و كمان ضربة جزاء

هتلاحظوا أني ضدد فرنســـا و تقولولي هي فرنســا عملتلك أيه

هقولكم فرنســـا فازت علي البرازيل(اللي هي فريق كفر أبو حمص)بضربة حظ

و فازت علي البرتغال من وجهة نظري بالكوسة

و أنا مكرهش أد الكوسة مش عارف ليه مصر متصدرش كل محصول الكوسة لأوربا

يمكن حالنا يتعدل و هما يتوكسوا زي ما أحنا موكوسين

نهاية الكلام أنا مع الحق و اللي يستحق و طبعاً لو ربنا شايف أن فرنسا تستحق

يبقي فرنسا هنفوز ولو ربنا شايف أن أيطاليـــا تستحق يبقي أيطاليـــا هتفوز

نرجع بقي للسؤال التاني: وهو نفسك تهج الي أيطاليـــا؟

أكيد لو سألت كل الشباب المصري السؤال ده هتلاقي الرد بسرعة و من غير تفكير

يا ريت ..و يكمل...تعرف تسفرني؟؟

و أنا من الشباب دول ..علي فكرة أنا مش عايز أهرب و أسيب البلد لا سمح الله

أنا عايز أبعد عن الكوسة

يمكن يتصلح حالي و أستورد محصول الكوسة من كل بيت مصري

و ساعتها أقدر أرجع مصر اللي منكرش فضلها عليا(مش عارف فضل أيه؟)لكن بسمع الناس بتقول كدة

و أخيراً يا رب أيطاليــــا

و نلتقي بعد هذا الفاصل....معلش بتفرج علي التلفزيون كتير