يسقط يسقط حكم العسكر

July 2, 2006

أومين..بين الخرافة و الرعب

شاهدت يوم السبت فيلم أومين و هو أول الأجزاء التي أرها بصراحة الفيلم حلو أوي أنا دخلت الفيلم لأني سمعت عن ولد مصري
ترك بيته لمدة خمس أيام و وجد علي الطريق الدائري و قد دهسته عربية و مات
و كان ذلك بعد مشاهدته أحد أجزاء سلسلة أومين دفعني حب المعرفة لمعرفة قصة هذه السلسة
كنت سهران طول ليلة السبت -مش علشان هروح اشوف الفيلم طبعاً- ولكن هذه الأيام أنام قليلاً و أسهر كثيراً
.المهم علشان متزهقوش كنت صاحي و جت الساعة 9 صباحاً
كنت علي أتفاق مع صديقي لذهاب الجامعة -لتخليص بعض الأوراق-جائني منه تليفون
قال:هاه يا ......جاهز ننزل
قولت : جاهز
نزلت و قبلته و ذهبنا إلي الجامعة. و علي باب الجامعة و أنا داخل
أمن الجامعة قالي:رايح فين؟
قولت:داخل أخلص شوية أوراق
قالي: أنهاردة السبت مفيش موظفين الموظفين أجازة
قولت في سري:أجازة هو انهاردة عيد الأم ولا أيه؟
لكن نسيت أن حكومتنا المصونة رفع الله شأنها-مش عايز اتحبس طبعاً-قررت أن يوم السبت
يكون أجازة رسمية.المهم قولت لصديقي:هنروح فين دلوقتي بقي أنا مش هروح البيت تاني
كانت الساعة قرب العاشرة كدة
قولت له : يلا بينا علي سيتي ستارز
قالي : الصبح كدة
قولت: طب هنعمل أيه يعني؟
أقنعته نروح سيتي ستارز و ندخل السينما عقبال ما المول يتملي ناس
وافق ركبنا و روحنا سيتي ستارز
و أنا داخل سيتي استارز لقيت الناس كتير اوي علي البوابة
قولت:أيه الناس دي كلها دي الساعة 12
المهم وقفنا شوية علي البوابة علشان الزحمة
دخلت المول لقيت المول كأنه باليل بالظبت.والبنات الحمد لله مالين المول
روحنا نحجز في السينما و أنا من الأول عايز أدخل فيلم أومين
و كمان قولت ندخل الأفلام العربي مع باقي صحابنا طبعاً أنا مش بقف في زحمة الحجز-طبعاً فكرني ببالغ و اقول زحمة فعلاً كانت زحمة
و قفت انا أتفرج علي البنات و دخل صاحبي يحجز في حفلة 1,30 هو بيظبت مع البنات و هو بيحجز و انا بظبت برة
و خرج ليا بالخبر السار....قال : أخر تذكرتين
قولت : الحمد لله كان اليوم مش هيمشي زي ماحنا عايز الحمد لله
قولنا نلف في المول لغاية معاد السينما... و بعد فترة ببص في الموبيل لقيت الساعة 1,30 وأحنا بعيد عن مكان السينما
مشينا بسرعة للسينما ..و دخلنا و الفيلم شغال يعني فاتنا 10 دقايق كدة
مش هقدر احكي لكم الأشتغالت أللي في الفيلم.. بص بصراحة الموسيقة التصويرية فوق الخيال
اترعبت كذا مرة بسبب الموسيقي..حسيت أني في بيت الرعب بتاع دريم بارك
خلاصة الفيلم....هههههههههههههههه
ست 6 أشخاص هيموتوا منهم بطلي الفيلم الوحيد أللي مش هيموت هو الولد الصغير اللي هو عامل كل الرعب ده
و هو في الفيلم أبن الشيطان..لكن البطل كان بيربه علي انه ابنه علشان الشياطين غيروا ابنه الحقيقي بالولد ده
و طبعاً امه في الفيلم مش أمه لأن هو أمه شيطانة
و في حكاية في الأنجيل -زي ما بيقوله في الفيلم-بتحكي قصة الولد و أنه تم أختيار البطل اللي هو سفير علشان يكون ابوة الولد
لأن حسب الأسطورة أن الولد هيخرج من قلب السياسة... و أكتر حاجة عجبتني بعد الموسيقي التصويرية
هو لما يروح البطل و المصور للقدس علشان يحضره طريقة يموتوا بيها الولد قبل ما يقتلهم
عحبني أوي المخرج أنه ظهر القدس علي حقيقتها أنها محتلة و الجنود الأسرائلين رايحن جاين و عاملين معابر
و تجد كمان علم فلسطين علي الحائط في نفس الكدر مع جندي اسرائيلي.. دا غير أنك هتسمع جزء من الآذان في الفيلم
و خلص الفيلم علي مشهد جنازة البطل..و نظرة الولد اللي توحي لك أن القصة منتهتش
و المدونة الجاية هنزل فيها صور الفيلم...أن شاء الله

2 comment:

ABEER said...

سبحان الله انا قريت الموضوع ده في يوم بالليل صحيت تاني يوم لقيت جزء من اجزاء الفيلم ده في التليفزيون .. قعدت اتفرجت عليه وفعلا كل اللي في الفيلم ماتوا الا الطفلة الشريرة اللي في الفيلم وبرضو مافيش نهاية في الاخر .. طب يمكن النهاية تكون في اخر جزء .. ولا هو مفيش نهاية اساسا .. ده من كتر الناس اللي ماتوا في الفيلم حسيت اني هموت وانا بتفرج بالمرة بقى ..

اٍبتسامة القمر said...

افتكر ان بعد مده
اتفرجت على الفلم ده فى التلفزيون
مع حبيبى بردو بس هو من بيته وانا من بيتى
وقالى ده رعب اتفرجى عليه وبجد خوفت وزعلت على موت الام
لكن بكلمه بعد الفلم ما خلص مبيردش
وتانى يوم بيقولى اصلى نمت
مع انه هو اللى قالى اتفرجى على الفيلم معايا
المهم تسلم ايدك