يسقط يسقط حكم العسكر

May 30, 2008

! أنا بحب..حالة الطوارئ

حالة الطوارئ أو كما يقال عنها قانون الطوارئ
أنا بحبها موووووووت البتاع دى
أستنى بس..انا لا حزب وطنى
ولا محتكر حديد ولا صاحب عبارة
انا هقولك انا بحبها ليه قبل ما تظن فيا السوء
قول يا سيدى-
..هقولك اهوه
حالة الطوارئ دى يا سيدى
أنا معرفش غيرها
اتولدت لاقتها
عرفتها قبل ما اعرف اخواتى
عرفتها قبل حبيبتى
عرفتها قبل الدستور وبيت الامة و احمد عز و ممدوح اسماعيل
حبيتها بجد و يا ريت تكون هى كمان بتحبنى
مش المثل بيقول
تعرف فلان..اعرفه
عشرته..لا..يبقى متعرفوش
اهو انا اعرف حالة الطوارئ
و عاشرتها
( :$ محدش يفكر فى حاجة قلة ادب )
سمعت من كام يوم كدة
ان الحكومة هتلغى حالة الطوارئ
تنفيذاً لوعد السيد الرئيس
( :D المنافق..الدليل اخر التدوينة )
انا من ساعة ما سمعت الخبر ده
وانا مش عارف اعمل ايه
معقول..معقول..معقول
حالة الطوارئ فى حد هيخدها منى
ازاى يعنى كدة
فى يوم وليلة كدة
يعنى اعشرها 20 سنة من الـ 27
و يخدوها منى بالسهولة دى كدة
يعنى انا ممكن يجى عليا يوم
اسافر اسكندرية و اعدى الطريق الصحراوى
!من غير ما تقف العربية فى كمين..؟
و مفيش امين شرطة هيفتح باب العربية
!و يقول : الأربعة اللى راكبين ورا ينزلوا..؟
و ينزل الاربعة اللى كنت مرة انا وابن عمتى منهم
و امين الشرطة يقولى : بطاقتك
و اطلع البطاقة و يبوص فيها و ميعرفش يقرا حاجة من الضلمة
فيسألنى : انت منين؟
و أقوله : القاهرة
يقولى : وجاى اسكندرية ليه؟
و يفتح معايا محضر شفوى
غالباً بنهى الحوار
بانى ابلغ امين الشرطة
انى طالب فى كلية الحقوق
و اطلعله الكارنيه
يبص فيه بأهتمام وبعدين يقولى
أتفضل اركب
!معقول الهيصة دى كلها مش هتحصل بعد كدة..؟
!معقول مش هتأخر 10 دقايق على الطريق فى كل مرة اروح اسكندرية..؟
لا دى مش عيشة دى
انا مش مصدق انهم يخدوها منى بالطريقة البشعة دى
يعنى لما اروح مدينة نصر و امين شرطة يوقفنى فى الطريق
و يقولى بطاقتك و يقولى انت مش من مدينة نصر
!جاى هنا ليه..؟
!..بقى ده كمان بعد كدة مش هيحصل

يعنى لما اجى اسافر شرم الشيخ
..مش هطلع تصريح سفر
***هبقى زى زى الأسرائيلى الصهيونى ابن الـ
!لما بيدخل شرم من غير تصريح..؟
حقيقى حالة الطوارئ هتوحشنى
و هتوحش كل شاب اتولد فى حجرها
هتوحش سواقين الميكروباص اللى بيطلع عنهم بسببها
هتوحش كل اللى بيعمل مظاهرة ويقول لا لمبارك
و مييلاقيش الأمن ادخل لأنه مبقاش من حقه
علشان مبقاش فيه حالة الطوارئ
بس الحمدلله
الحكومة شكلها كانت عارفة
مدى حب وتقدير شعب مصر لحالة الطوارئ
و عملت بالمثل اللى بياخد بيه معظم المصريين
..وهو
(اللى نعرفه (حالة الطوارئ) أحسن من اللى منعرفوش (قانون الأرهاب
و قررت انها تمد حالة الطوارئ لمدة سنتين كمان
و كله بموافقة الشعب..قصدى نواب الحزب الواطى
يعنى حالة الطوارئ قاعدة معنا لحد 2010
..زى اللى ميسماش
و بكدة هيكون الرئيس مبارك
هو أول رئيس جمهورية فى تاريخ البنى آدمين
يحكم عهده كله تحت حالة الطوارئ
و يسطر الرئيس فصول من التاريخ
بهذه الميزة اللى تميز بيها على
هتلر..و موسولينى..و لينن..و بل و على فراعنة مصر
من الأسرة الأولى و لحد الأسرة و الطفل
لو بجد ولو حقيقى
ان حالة الطوارئ دى منعت بلاوى عن مصر
زى ما بيقول الجماعة الواطية
!يبقى كل الأحداث اللى هقولها دى كانت هزار ولا ايه؟
.في 21 أكتوبر 1992 فقد قتل سائح بريطاني قرب ديروط بمحافظة أسيوط*
.في 26 فبراير 1993 قتل سائح تركي وآخر سويدي ومصري في انفجار قنبلة بمقهى في قلب القاهرة. وجرح 19 شخصا آخرين بما في ذلك 6 أجانب*
.في 8 يونيو 1993 تم إلقاء قنبلة على حافلة سياحية قرب الأهرام ما أسفر عن مقتل مصريين وجرح 15 بما فيهم سائحان بريطانيان*

. في 26 أكتوبر 1993 قتل أمريكيين وفرنسي وإيطالي وجرح سائحين آخرين في هجوم شنه رجل على فندق سميراميس بالقاهرة*
.أما في 26 أغسطس 1994 قام متطرفون بإطلاق النار على حافلة سياحية في بين الأقصر وسوهاج ما أسفر عن مقتل شاب أسباني*
.في 27 سبتمبر 1994 قتل ألمانيان ومصريان في منتجع بالبحر الأحمر*

.في 18 ابريل 1996 فقط قتل 18 سائحا يونانيا وأصيب 14 بجروح في هجوم على واجهة فندق أوروبا قرب أهرام الجيزة*
.وتبنت الهجوم «الجماعة الإسلامية» قائلة إنها استهدفت سياحا إسرائيليين
.في 18 سبتمبر أيلول 1997، قتل تسعة مصطافين ألمان وسائقهم المصري بعد أن تم تفجير حافلتهم خارج المتحف المصري وسط القاهرة*
.في 17 نوفمبر 1997، قتل 62 شخصا بما فيهم 58 سائحا في الأقصر*

في 7 أكتوبر 2004، لقي 34 شخصا من بينهم سياح إسرائيليون حتفهم وجرح 10 آخرون*
.في ثلاثة انفجارات استهدفت فندق هيلتون طابا ومنتجعين سياحيين آخرين في سيناء
.في 7 ابريل 2005 فقد وقع انفجار في قلب المدينة القديمة بالقاهرة ما أودى بحياة فرنسيين وأمريكي بالإضافة إلى منفذ الهجوم*

. في 30 ابريل 2005، قتل شخص واحد وجرح ثمانية آخرين في انفجار قرب المتحف المصري بالقاهرة*
. في23 يوليو 2005، قتل 60 شخصا على الاقل في سلسلة انفجارات استهدفت منتجع شرم الشيخ على ساحل البحر الأحمر*
!يا لهوز بقى كل ده و مصر فى حالة طوارئ..؟
بس منخبيش على بعض ان الحكومة لعبة لعبة خبيثة
الحكومة خيرت الشعب و الشعب اختار
:الحكومة قالت
تحبوا نمد حالة الطوارئ وهى تشاور بيدها لتكميم الافواه
ولا تحبوا نقر قانون الأرهاب وهى تشاور بقطع الرأس
فختار نواب الحزب الواطى تكميم الافواه
حتى يبقى من يقولوا انهم نواب بالنيابة عنهم
كل مد لحالة الطوارئ وانتم بخير
و كل وعد لريس و هو طيب
بس قبل ما امشى كنت عايز افكركم بحديث شريف

عن أبي هريرة- رضي الله عنه- أن رسول الله صلى الله عليه وسلم
.قال:" آية المنافق ثلاث: إذا حدث كذب، وإذا وعد أخلف ، وإذا اؤتمن خان" متفقٌ عليه
.وفي رواية :" وإن صام وصلى وزعم انهُ مسلمٌ
"
انا مقصدش حاجة بس انا بحب الحديث ده
:D

3 comment:

امال سامي said...

"ويل للشوعب المنكوبة بالاستبداد المحكوم عليها بان تصفق للعبيد وتلعن الاحرار"

مصطفى امين


انا بقى

تبع المكممة افواههم

DOLA said...

تصفق للعبيد..وتلعن الأحرار
يالهوى على التعبير
وهو ده فعلاً اللى حاصل دلوقتى
شكراً امال على الزيارة الدائمة
واتمنى لكى التوفيق الدائم

Anonymous said...

ريان تتوقع أجنبي هو الي قتل السعودي ؟ .ولو كان سكران الأجنبي ممكن يشتمك بس ما يقدر يمس شعره منك…..هذا تحليلي