الله يحرق دمكم

وكمْ ذا بمصر من المُضْحِكات .. ولكنه ضحك كالبكا" - المتنبى"

تحديث:
الطالبة اشتكت للمدير تحرش الشباب بها.. فقال لها معذورين

قرر أسامة النادى مدير عام إدارة زفتى التعليمية بمحافظة الغربية بإشراف محمد قاسم جعفر وكيل وزارة التربية والتعليم بالمحافظة نقل محمود الألفى مدير مدرسة الشهيد أحمد سيف الإسلام بشتى الإعدادية بسبب قيامة بالتلفظ بألفاظ خادشة للحياء العام لإحدى طالبات المدرسة عندما اشتكت له من تحرش عدد من الشباب بها داخل المدرسة.
وتبين للجنة أن المدرسة بدون سور خارجى مما يسهل دخول الشباب للمدرسة، واعتياد مجموعة من البلطجية الدخول للمدرسة فى أى وقت

تعليقى:
مدرسة بنات من غير سور .. صدق او لا تصدق
لو انت قاعد فى مدرجات الدرجة التالتة .. هتصدق
لو انت قاعد فى مدرجات الدرجة التانية .. هتستغرب
لو انت قاعد فى المقصورة جنب وزير التعليم ابو لاب توب .. مش هتصدق
يعنى وجعين دماغنا بتطوير التعليم وجودة التعليم و بناء مدارس جديدة
و مدرستى نظيفة جميلة متطورة!
دا المدرسة من غير سور يا كافرا
طب مستنين ايه من المدير غير انه يغلط البنت!
هو هيقدر يعمل حاجة للبلطجية اللى احتلوا المدرسة
و على راى سمير غانم .. الكورة فيييييييييين؟!
السور فين يا معالى وزير التخريب .. بلاب توب بتاعك ده
مع احترامى لجريدة الشروق .. المدير مش غلطان و لا البنت غلطانة و لا البلطجية غلطانين
الغلط على المدرسة اللى من غير سور .. يا ترى السور راح فين؟
اتصل من مصر على وزير التخريب
و اتصل من سوريا على عم محمد البقال
و ابقوا قبلونى الحلقة الجاية!

ــــــــــــــــــــــ....................................ــــــــــــــــــــــ

:بعد قضائه ثلاث أرباع المدة

الإفراج عن الضابط المتهم فى قضية عماد الكبير

قام قطاع مصلحة السجون بوزارة الداخلية، بالإفراج عن نقيب الشرطة إسلام نبيه
الضابط الذى كان يقضى عقوبة الحبس لمدة ثلاث سنوات فى قضية تعذيب عماد الكبير الشهيرة بعد قضائه ثلاث أرباع المدة

تعليقى:
ظابط هتك عرض و تعدى بالضرب و احتجز مواطن و عذبه و صوره
و قام بتوزع اسطونات مخلة بالأداب العامة
يطلع بثلاث ارباع المدة؟! و كمان يكمل فى الخدمة؟!
و فى اسيوط كمان يعنى رجالة اسيوط تخلى بالها من نفسها
علشان الداخلية متقدرش تستغنى عن ظابط متحرش شاذ
و للعلم جريمة التعذيب جريمة غير مخلة بالشرف فى مصر!
يعنى ايمن نور اللى المفروض انه مزور ورق جريمته مخلة بالشرف
اما اسلام نبيه اللى هتك عرض و تعدى بالضرب و احتجز مواطن و عذبه و صوره
و قام بتوزع اسطونات على موقف الميكروباص
جريمته غير مخلة بالشرف و يحق له الأستمرار فى عمله وممكن كمان يبقى وزير الداخلية ..
مين عارف؟!
طب و عبود الزمر اللى اتحكم عليه بالسجن
في قضيتي اغتيال السادات (25 عاما) وتنظيم الجهاد (15 عاما)
و انتهت مدة عقوبته في 2001 و احنا فى 2009 و هو لسة مسجون ..
مخرجش ليه بثلث ارباع المدة زى سمسم؟!
حد يقولى اصل سمسم نقيب شرطه ..
هرد عليه واقوله طب ما عبود الزمر كان مقدم في الاستخبارات الحربية
و اتسجن علشان كان عارف .. عارف بس بعملية اغتيال السادات قبل حدوثها و لم يبلغ؟!
أكيد النظام الحاكم فى مصر اتبرع بدمه لضحايا غزة .. علشان الواضح انهم معندهمش دم

ــــــــــــــــــــــ....................................ــــــــــــــــــــــ

وصفه بأنه "أشرف" من الإخوان..
مفيد فوزى لـ"90 دقيقة": جمال مبارك رئيس مصر القادم

أدلى الإعلامى مفيد فوزى أمس، الأربعاء، بتصريحات ساخنة فى برنامج 90 دقيقة، ردا على سؤال معتز الدمرداش عن ترشيح جمال مبارك بعد والده، قال فيها
"جمال مبارك هو رئيس مصر القادم وهو أشرف بكثير من الإخوان وإن أعطانى الله عمرا سأنتخبه"

تعليقى:
وحياة أمك؟!
مين ده اللى اشرف من الأخوان؟!
ولى العهد اللى حاشيته متتخيرش عن حاشية ابوه
دا اصحابه نجوم صفحة الحوادث خد عندك
1 - محتكر حديد ( بيت العز يا بيتنا )
2 - تاجر مصانع و شركات قطاع عام ( بيسمع محمد "محى" )
3 - متهم محرض على القتل ( جريمتى .. جريمة مصرية على ارض عربية )
4 - مهرب فياجرا فى بودرة السراميك ( سيراميكا فياجرا )
هما دول حاشيتة ولى العهد اللى مش هننتخبه و هيجى غصب و اقتدار؟!
لا جمال ولا اخوان .. البلد دى بتعتنا احنا و اللى هيجى غصب عننا هنولع فيه و فى اللى جابوه
و زى ما نوارة نجم كانت بتقول : أنا مش عايزة جمال مبارك
أنا كمان مش عايز جمال مبارك .. أنا عايز واحد ماجنم كومبو لارج و عصير بدل الغازية

Related articles

• التعذيب .. جريمة مخلة بالشرف - بقلم: نبيل ذكي