البرلمان فى اى دولة ليه وظائف معينة اتخلق علشانها و الوظائف دى هى تشريع القوانين ومحاسبة الحكومة اما البرلمان اللى بيكون عامل زى المسرح اللى لا بيشرع ولا بيحاسب مش المفروض نقول عليه.. برلمان البرلمان المصرى - مجازاً نقول برلمان - حصل فيه كتير من الاحداث اللى تؤكد على انه مش برلمان ممكن يكون حاجة تانية غير انه برلمان.. ففى واقعة أزأزة اللب و التسالى و اللى كان بطلها رئيس الوزراء و عدد من الوزراء ممكن نعتبر ان البرلمان المصرى وقتها كان مسرح او سينما لكن استحالة ده يكون مكان للمحاسبة و لتشريع القوانين و مناقشة احوال البلد.. وضرب لنا النواب مثلاً ونسى ان اسمه مجلس الشعب
الواقعة التانية لما نائب قلع لاموخذة جذمته و رفعها فى وش النواب و بعد كدة لما سؤالوه قال انا كنت برفعها فى وش اسرائيل !! طب هى فين اسرائيل يعم الحاج اللى فى البرلمان الواقعة التالتة و اللى حدثت من كام يوم كدة لما رد النائب علاء عبد المنعم على وصف نائب من الحزب الوطنى له انه بيتمايل كالمرأة اللعوب و قال النائب علاء عبد المنعم ان الكلام ده لا يصدر الأ من عاهرة ولما طلع النائب علاء عبد المنعم فى المحور قال انه مرة كان حاطط شنطته و حاجز بيها مكان فجه نائب الوطنى و رمى الشنطة على الارض وقعد مكانها و الواقعة الرابعة نائبين واحد قال لتانى اللى بتعمله ده سفالة رد التانى عليه قاله و اللى بتعمله ده قلة ادب تخيلوا بقى ان ده بيحصل فى برلمان يعنى لو مكتبتش انه حصل فى برلمان ممكن تفكر ان دى خناقة اطفال فى حضانة.. فهل اصبح مجلس الشعب.. حضانة الشعب ام ان نواب المجلس لا يجدوا مشاكل ولا قوانين و قاعدين فاضين يا عينى علشان كدة بيجروا شكل بعض؟
فيديو واقعة " العاهرة " بطولة النائب علاء عبد المنعم
فكرت شوية فى الموضوع و لقيت ان نواب الحزب الوطنى سايقين الهبل على الشيطانة فى مجلس الشعب و كأنهم واخدين ضوء أخضر بقلة الأدب اللى بيعملوها دى.. و اللى بتدفع نواب المعارضة لأخذ حقهم بلسانهم او بدراعهم لأن مفيش نائب حزب وطنى بيتحاسب او بيتحول للجنة القيم المسؤلة عن محاسبة النواب عند خروجهم عن اعراف وتقاليد المجتمع و الأخلاق و المثل و لا اخفى اعجابى بذكاء النائب علاء عبد المنعم الذى استطاع ان يأخذ حقه تالت ومتلت و لكنى أفضل ان يكون البرلمان او المجلس مجلس شعب بحق.. لا حضانة
ملحوظة: انا مضايق جدا من الراجل اللى اسمه عبد الرحيم الغول ده و فى نائب تانى كدة مش بطيقهم و المصيبة انى كنت بتفرج على فيديو جلسة رفع الحصانة عن دكتور ايمن نور ولقيته بيتعصب و بيقاطع دكتور نور
فى وجوه فى مجلس الشعب المصرى عايزة تتعدم زى الخنازير اللى اتعدمت فى مصر
0 comment:
Post a Comment