يسقط يسقط حكم العسكر

February 24, 2009

مجلسى اللب و التسالى

مش عارف هو احنا ليه مستغربين اوى من ان ممثلى الحكومة
بيأزأزوا لب و ياكلوا تسالى فى مجلس الشعب
!مع ان ده حرية شخصية
واحد صحى الصبح عارف ان عنده فسحة فى مجلس الشعب
او بلاش فسحة يا سيدى رايح مسرح هيتفرج على أرجوزات .. قصدى نواب عن الشعب
فلازم يكون جاهز باللب و التسالى علشان القاعدة متبقاش مملة
هما كلهم 3 او 4 ساعات النواب هيشقلبوا فيهم و ممثلين الحكومة هيستمتعوا
و يأزأزوا و يتسلوا بالعرض البهلوانى اللى بيعرض على مسرح مجلس الشعب

عادى جدا يعنى
طب قولى انت بس .. ممثلين الحكومة من وزراء و نواب عنهم
هيهتموا بالمجلس ليه؟
هيحترموا المجلس ليه؟
هيحترموا النواب اصلا ليه؟
يعم دول نواب عن الشعب يعنى عادى جدا
هما بيحترموا الشعب علشان يحترموا النواب اللى جاين بالنيابة عنه؟
!يعنى هو مجلس الشعب مش معلقين قدامه يافطة زى دى؟

شوفت يا عم .. مش قولتلك
فى المدرج اللى هو مفهوش كاميرات بتصور و لا مستقبل دولة ولا قوانين هتتسلق
ممنوع المحمول و يحذر التدخين و يحذر المأكولات و المشروبات
كل الطلبة بتشوف اليافطة دى كل يوم
و مع ذلك ادخل جوة المدرج
هتلاقى اكل و شرب و محمول و نانسى وهيفا وكمان هتلاقى ناس بتدخن
عارفين ليه؟
لأن الطلبة متعلمتش حاجة اسمها
احترام المكان و احترام الدكتور
بالظبط الوزراء متعلموش حاجة اسمها

احترام الشعب و احترام نوابه
حكومة لا تحترم شعبها
زى تلميذ لا يحترم استاذه
الحكومة مش فوق الشعب .. الحكومة تحت رجلين الشعب
و لو حقيقى ان حكومة نظيف بتحترم الشعب
مكنش حد من ممثليها أزأز لب و كل تسالى
لأن المجلس اسمه مجلس الشعب
.مش مجلس اللب والتسالى


Gaza Holocaust Museum

0 comment: